Balaba miuyon sa gitumbok nga dili maayong pagdumala sa LWUA, nanawagan og aksyon sa Konseho

SUPORTADO ni Konsehal Joyleen Mercedes L. Balaba ang resolusyon ni Majority Floor Leader, Konsehal Edgar S. Cabanlas, sa pagkondena sa Local Water Utilities Administration (LWUA) bahin sa dili maayong pagdumala sa pundo sa Cagayan de Oro Water District (COWD).

Matod ni Balaba nga ang report sa Commission on Audit (COA) nagpakita nga dili maayo ang pagdumala sa pundo, ilabi na sa wala matarong nga pag-disburse.

“Kini atong kwarta, kita ang gabayad sa tubig. Apan sa wala pa mag-usa ka tuig, P253 milyon na ang nadisburse nga wala matarong,” pamahayag ni Balaba.

Ingon nga usa ka taxpayer, misupak si Balaba sa kakulang sa transparency ug accountability sa interim management sa COWD, ug siya nagkanayon nga ang Konseho sa Syudad adunay katungod sa pagmintinar sa maayong paggamit sa pundo sa katawhan.

“Gusto nako mahibaw-an giunsa pag-gasto ang P253 milyon. Dili man siguro ni confidential fund nga wala nay resibo-resibo. Dili ko kabalo kung ilang na-comply, pero kung naay delay ug wala nila na-submit, mas dako ang akong pagsuporta sa pagkondena sa dugay nga pagpabilin sa interim management sa COWD,” dugang sa konsehal.

Nagtoo si Balaba nga ang City Council mao ang tingog sa katawhan sa dakbayan ug adunay gahom ang lokal nga kagamhanan sa paggamit sa iyang police power alang sa interes sa katawhan. (JAOclarit/SP)