Balaba miawhag sa mga Kagay-anon pagduyog sa National Hijab Day

Agig pagpakita sa panaghiusa sa mga igsoong Muslim, si Konsehal Girlie Balaba mitambong sa sesyon sa konseho niadtong Lunes nga nagsuot og hijab, usa ka matang sa bilo nga suoton sa mga babayeng Muslim pag-madalaga na.

Sa sesyon nga gidumala ni Bise Mayor bebot Rodriguez, si Balaba miingon nga dinhi sa nasud gideklara ang Pebrero 1 matag tuig nga National Hijab Day aron pagpahinungod sa mga babayeng Muslim nga magsuot og hijab.

Angayang madayeg ang usa ka babaye dili tungod sa makitang kaanyag kun dili sa ilang taras ug nahimong kaakuhan sa komunidad, pamahayag ni Konsehal Balaba.

Niini, siya nagdasig sa mga Kagay-anon pagduyog sa kalihokan alang sa kahigayonan nga mapakita ang panagdait ug panaghiusa sa tanan.