Bag-ong Mortuary Admin Building sa CDO Memorial Park gisubhan

Hayan makahatag na sa maayong serbisyo sa atong mga igsoong kabus sa syudad nga adunay mga kaparentihan nga mitaliwan sa lain kalibutan ang pormal nga pag-abli sa bag-ong Mortuary Admin Building ug Chapel diha sa Cagayan de Oro Memorial Park.

Si Konsehal Edgar Cabanlas, chairman sa komite sa urban & rural poor and housing development, ang mirepresentar ni City Mayor Rolando Klarex Uy nga pinasidunggang dinapit ug mamomolong sa maong programa nga gitawag ug KASUB-ANAN, SERBISYO TA UY.

Sa iyang mensahe, si Cabanlas mipaabot sa iyang dakong pagpasalamat ni Mayor Rolando Klarex Uy uban sa pag-abag sa Konseho sa syudad sa pagtibawas sa maong proyekto nga sibo ug haum sa panginahanlan sa mga kabus nga katawhan sa Dakbayan nga wala intawon ikagahom nga makapahilona sa ilang mga minahal sa kinabuhi nga mitaliwan.

Dugang pa ni Cabanlas nga tinguha niini nga proyekto nga mahatagan sa desente ug libre nga pagserbisyo lakip na ang libreng lungon ug pag-imbalsamar ug sa bag-ong simbahan nga gitukod sa maong sam-ang. Niini malaumon si Cabanlas nga makahatag kini ug dakong pagserbisyo sa atong mga kaigsoonang kabus sa Dakbayan.