Bag-ong Miss Grand Philippines mibisita sa CDO

Mainitong giabi-abi sa mga opisyal ug kawani sa City Hall si Miss Grand Philippines 2023 Nikki de Moura kinsa mibisita atol sa Flag Raising Ceremony kagahapon. Nasayran nga si de Moura ang unang Miss Grand Philippines 2023 human gipahigayon ang unang kompetisyon alang sa maong pageant niadtong Hulyo 13, 2023 didto sa Pasay City.

Niini, siya ang morepresentar sa nasud sa Miss Grand International nga gitakda sa Vietnam sa umaabot Oktubre, ning tuig.

Mahinumdoman nga ang konseho sa syudad ubos ni Bise Mayor Bebot Rodriguez una nang misagop sa Resolosyon No. 14647-2023 nga nagpahalipay ug nagdayeg ni Nikki de Moura sa iyang naangkong kalampusan human sya nakoronahan isip Miss Grand Philippines 2023. Gibutyag nga dakong garbo sa dakbayan ang kalampusang naangkon ni de Moura isip usa ka Kagay-anon.

Alayon niini, si Konsehal Jay Roa Pascual, chairman sa Komite sa Turismo, atol sa flag raising ceremony sa City Hall miingon nga talagsaon ug natural kaayo ang hiyas ug kaanyag ni de Moura hinungdan nga nakadaog usab siya sa miaging indigay sa Miss Teen Philippines.

Nanghinaut si Pascual nga unta sa iyang pagdaog mas maila pa ang syudad kay iyang mapakita ang katahom sa dakbayan ug maaghat ang mga batan-on dinha sa pagsalmot sa susamang mga indigay.