Ayuda sa biktima sa sunog, baha sa Kauswagan gigahin

GIUYUNAN na sa konseho sa syudad ubos ni Bise Mayor Bebot Rodriguez ang ordinansa sa Barangay Kauswagan nga naggahin og P69 mil kapin aron matunol nga ayudang pinansyal sa mga biktima sa sunog niadtong Nobyembre 16, 2021 ug biktima sa baha niadtong Enero 12, 2022.

Kini human gisagop sa konseho ang resolosyon nga nag-uli sa ordinansa sa barangay nga naggahin sa nahisgotang kantidad gikan sa barangay 5% Local Disaster Risk Reduction and Management Fund (LDRRMF) alang sa maong katuyuan.

Mahinumduman nga ang Kauswagan una nang mideklara sa maong mga dapit nga ubos sa estado sa kalamidad.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam S. Lim ug komite sa pamalaod ni Konsehal Ian Mark Nacaya.