ASEZ WAO gisuportahan, gidayeg sa konseho

HUGOT nga gidayeg ug gipasalamatan sa konseho sa syudad ubos ni Bise Mayor Bebot Rodriguez ang grupong Save the Earth from A to Z We Are One (ASEZ WAO).

Kini human si Konsehal Bernie Esparcia, chairman sa komite sa climate change, sa sesyon niadtong Martes nga gidumala ni Presiding Officer Protempore Konsehal Romeo Calizo, mibutyag nga mibisita dinhi sa dakbayan ang mga sakop sa grupo.

Kini, pundok sa mga batan-on nga ang katuyuan nagsentro sa pag-promote sa kahibalo kalabot sa kinaiyahan lakip na mga social issues mahitungod sa kapobrehon ug pagtabang panahon sa katalagman diin kasagaran sa mga sakop mga Korean.

Si Esparcia midugang nga dugay na ang maong grupo naglihok, dili lang sa nasud apan sa tibuok kalibutan ug gani giila sila sa United Nations ug dugay na usab sila dinhi sa syudad. Lakip sa mga kalihukan nga ilang gipatuman mao ang paglimpyo ingon man pagpananum og mga kahoy diha sa Sitio Mapawa sa tinguha nga mapreserbar ang kinaiyahan alang sa umaabot nga henerasyon.

Gipasabot sa konsehal nga tukma sa panahon nga siya ang bag-ong chairman sa komite sa hinungdan nga gusto niya nga paminawon ug suportahan ang katuyuan sa grupo ug iyang gihangyo ang mga sakop sa konseho nga masuportahan ang mga kalihukan alang sa malahutayong pagproteher sa kinaiyahan. Usa ka resolosyon ang gipasaka sa konseho nga nagdayeg sa maong grupo tungod sa ilang dakong kontribusyon sa kinaiyahan.