Aplikasyon sa gaming station gihangyo sundon ang rekisitos

SI Konsehal Roger Abaday, Chairman sa Komite sa Games and Amusement, kanunay’ng mipasabot nga andam ang syudad pagdawat sa mga negosyante nga gustong mobobo sa ilang puhonan kay dako kini ug makatabang sa kinitaan ug pagpang-empliyo sa katawhan sa dakbayan.

Apan angayan lang usab nga mosunod sila sa mga rekisitos nga nalatid sa balaod, sumpay sa Konsehal.

Gipasabot ni Konsehal Abaday ang maong punto atol sa tigom sa komite human ang tigdumala sa Uno Dos International Gaming Corporation ni Mr. Ian Jay Patanao misumite sa ilang aplikasyon ug gipresenta niini ang pamaagi sa dula nga off-track betting system nga  gitawag og  Uno Dos.

Sumala sa konsehal nga nagkadaghan na ang gaming station nga nag-operate sa syudad ug malaumon nga  magpabilin kining magmalinawon sukwahi sa gakahitabo sa ubang dapit.

Ang maong aplikasyon subling tukion sa sunod tigom sa komite ug malaumon nga masunod ug makumpleto sa aplikante ang tanang rekisitos subay sa balaod sa syudad.