Aplikasyon sa 3-stag derby sa Indahag giaprobahan

GIUYONAN sa Konseho sa syudad, sa sesyon niadtong Lunes nga gidumala ni Bise Mayor Bebot Rodriguez, ang ordinansa nga naghatag og panugot ni Victor Cabeltes sa pagpahigayon og 3-stag derby cockfight sa umaabot Oktobre 9, 2024 dinha sa Indahag Square Garden, Sitio Lomboy, Barangay Indahag.

Nasayran nga nakaduso si Cabeltes sa tanang rekisitos nga gisitar sa balaod bahin sa pagpahigayon sa maong matang sa kalingawan.

Mahinumduman nga gihikling sa Komite sa Games and Amusement ni Konsehal Roger Abaday sa unang hangyo ni Cabeltes human kini napakyas sa pagtambong sa tigom sa komite ug nasuta nga kulang usab sa iyang giduso sa mga dokumento.

Gibutyag sa City Legal Office nga kinahanglang mahiuyon kini sa ordinansa sa syudad nga naglatid nga ang sabong mapahigayon lamang atol sa mga pista ug uban pang opisyal nga kalihokan sa barangay.

Nunot niini, nangayo si Cabeltes og panugot gikan sa Barangay Indahag alang sa maong katuyoan ug miduso sa mga dokumento nga gipangayo sa komite ni Konsehal Abaday. 

Si Konsehal Roger Abaday, chairman sa Komite sa Games and Amusement, maoy nangamahan sa gipasakang ordinansa.