Aplikasyon alang sa OYLA batch 3 sugdan pagdawat sa Mayo 1

SI konsehal John Michael Seno, chairman sa komite sa sports & youth development, padayong misuporta sa mga proyekto ug programa sa Oro Youth Development Office.

Gitumbok sa konsehal nga magsugod sa umaabot Mayo 1, 2021 ang pagdawat sa aplikasyon alang sa Oro Youth Leadership Academy Batch 3 (OYLA3).

Kini nga programa pagahimoon pinaagi sa serye sa mga modular, workshops ug trainings uban sa pag-abag sa kagamhanan.

Sa tinguha nga daghang kabataan ang madasig nga makaapil sa natad sa pagpangulo ug moapil sa mga kalihokan nga gihatag agig pagpangandam sa mga kabatan-onan nga mangulo sa umaabot sa katilingban.

Niini, kusganong manawagan ang konsehal sa kabatan-onan sa dakbayan nga makiglambigit sa programa. Kung ikaw usa ka batan-ong interesado mopailawom sa maong leadership skills, mahimo nang mosumete sa aplikasyon sa umaabot Mayo 1, 2021.

Mahimo usab mobisita sa Oro Youth Facebook account alang sa kwalipikasyon og dugang impormasyon. Be part of this growing network of young leaders, panapos ni konsehal Seno.