Annual Budget sa SK sa duha ka brgy giuyonan sa konseho

HINGPIT nang mapatuman ang mga programa ug proyekto sa mga kabatan-unan sa barangay Bugo ug Patag ning syudad.

Kini human ang konseho ubos ni Bise Mayor Kikang Uy sa sesyon niadtong Lunes misagop sa managlahing resolusyon nga nag-uli sa ilang ordinansa nga may kalabutan sa ilang 2021 Annual Budget nga mobalor P2,948,247.60 alang sa Barangay Bugo ug P1,771,558.00 sa Barangay Patag.

Ang maong mga pundo gamiton sa pagpatuman sa ilang mga programa ug proyekto nga

gihatagan og prayoridad ning tuiga subay sa mandato sa RA 10742 kon Sangguniang Kabataan Reform Act of 2015.

Lakip sa gipundohan sa duha ka barangay ang maintenance and other operating expenses, pagpamalit og mga ekipo alang sa ilang buhatan ug uban pang mga programa nga makahatag og dugang kalamboan sa kabatan-onan.

Si Konsehal John Michael Seno, mipasabot nga ang maong ordinansa miagi sa makuting pagtuon ug deliberasyon sa lain laing buhatan sa City Hall ug hintungdang mga komite sa konseho ug nasuta nga mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyohan sa komite sa Sports and Youth Development ni Konsehal Seno ug komite sa Pamalaod ni Konsehal Ian Mark Nacaya.