Annual budget sa SK sa Brgy 11, Agusan giuyonan sa Konseho

MAPATUMAN na ang mga programa ug proyekto alang sa kabatan-onan sa duha ka barangay, ning syudad.

Kini human ang Konseho sa sesyon niadtong Lunes nga gidumala ni Bise Mayor Kikang Uy, misagop sa resolusyon nga nag-uli sa resolusyon sa Barangay 11 ug Barangay Agusan diin nasukip ang ilang 2022 SK Annual Budget.

Sa Barangay 11 adunay gibanabanang kinitaan ug galastohon balor P345,230.00 samtang sa Barangay Agusan mobalor og P2,624,387.00 ang ilang annual budget.

Gihatagan sa prioridad sa duha ka barangay nga mapatuman karong tuiga ang programa paghatag og dugang kahibalo ug edukasyon kabahin sa panglawas sa kabatan-onan, pagproteher sa kinaiyahan ug uban pang programa nga maghatag dugang kalamboan sa mga kabatan-onan sa dapit.

Dugang pa, ang Barangay 11 migahin usab og pundo alang sa programa sa paugnat sa kusog, pagpalit og portable speaker, daylight projector, laptop, computer set ug printer samtang ang Barangay Agusan migahin usab og igong pundo nga magamit sa pagpalit og duha ka unit nga personal computer, usa ka set sa sound system, usa ka unit nga laptop ug usa ka unit nga welding machine.

Ang resolusyon nga gisagop sa Konseho alang sa maong katuyuan gipaluyohan sa Komite sa Sports and Youth Development ni Konsehal John Michael Seno ug Komite sa Pamalaod ni Konsehal Ian Mark Nacaya.

Malaumon si Seno nga ang maong mga programa makahatag og dakong kalamboan sa kabatan-onan sa duha ka barangay. (SP/RNQuiblat)