Annual budget sa SK Brgy 10, 29 mapatuman

Mapatuman na sa hingpit sa mga opisyal sa Sangguniang Kabataan sa duha ka mga barangay sa syudad ang ilang mga programa ug proyekto nga gilantaw’ng maghatag og dugang kaarangan sa sektor sa kabatan-onan. Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez misagop sa duha ka mga resolosyon nga nag-uli sa tagsa tagsa ka resolosyon sa Barangay 10 ug 29 nga may kalabotan sa ilang SK 2023 Annual Budget.

Ang maong budget naglangkob sa gibanabanang kinitaan ug galastohon balor P339,240.00 alang sa Barangay 10 ug P392,290.00 sa Barangay 29. Ang maong mga pundo gamiton sa pagpatuman sa mga programa ug proyekto nga gihatagan og prayoridad niining tuig subay sa probisyon sa RA 10742 kon Sangguniang Kabataan Reform Act of 2015.

Lakip sa gipundohan sa maong mga budget ang programa sa pagpalambo sa paugnat sa kusog, pagproteher sa kinaiyahan, active citizenship/ capability building, kampanya kontra droga, pagpalit og usa ka unit computer set ug uban pa.

Si Konsehal John Michael Seno, chairman sa komite sa Sports and Youth Development, kinsa usa sa nagpaluyo sa gisagop nga resolusyon mipadayag sa iyang suporta sa maong lakang human nakita nga nahisubay kini sa balaod ug dako ang ikatabang alang sa kaarangan ug kalamboan sa mga kabatan-onan.

Ang mga resolusyon nga gipalabang sa konseho alang sa maong katuyoan gipaluyohan usab sa komite sa pamalaod ni Konsehal Edgar Cabanlas.