Annual Budget sa Nazareth giaprobahan sa Konseho

MAPATUMAN na sa hingpit sa Barangay Nazareth ning syudad ang ilang mga programa ug proyekto alang karong tuiga.

Kini human ang Konseho sa sesyon kagahapon nga gidumala ni Bise Mayor Bebot Rodriguez misagop og resolusyon nga nag-uli sa ordinansa sa maong barangay nga may kalabutan sa ilang annual budget nga mokabat sa P13.1 milyon kapin alang sa implementasyon.

Lakip sa gipunduhan sa maong budget ang 20% development fund nga mokabat sa P1,560,954 nga gilangkoban sa pagrehabilitar sa ilang health center , multi-purpose hall ug drainage system ingon man ang paghinlo sa mga canal.

Migahin usab ang barangay og 5% nga Barangay Disaster Risk Reduction and Management Fund balor P655, 407 mil aron gamiton sa pagpamalit og ekipo ingon man calamity related supplies nga magamit panahon sa kalamidad ug 10% nga pundo alang Sangguniang Kabataan nga mokabat sa P1,310,814.

Ang resolusyon nga gipalabang sa Konseho alang sa maong katuyuan gipaluyuhan sa Komite sa Barangay Affairs ni Konsehal Yan Lam Lim ug Komite sa Palamaod ubos ni Konsehal Edgar Cabanlas.