Annual Budget sa Canitoan giaprobahan sa konseho

HINIUSANG giaprobahan sa konseho sa syudad ubos ni Bise Mayor Kikang Uy sa sesyon niadtong Lunes ang resolusyon nga nag-uli sa ordinansa sa barangay Canitoan ning syudad.

Kini may kalabutan sa ilang 2021 Annual Budget nga adunay gibana-banang kinitaan ug galastohon balor P29,725,344.

Lakip sa gihatagan prioridad sa barangay sa ilang AB ang pag-instalar og suga sa kadalanan gikan sa Zone 1 ngadto sa Zone 10, pagrehabilitar sa day care centers sa Zone 1, 2,4 ug 10 , pagpalit og lote aron tukuran sa multi-purpose building ug pagrehabilitar sa barangay isolation unit.

Gipunduhan usab sa barangay ang pagtunol og food assistance ug ubang ayuda ngatdo sa mga pamilya nga apektado sa Covid 19 , pagrehabilitar drainage system gikan sa Zone 1 ngadto sa Zone 10 ug uban pang programa ug proyekto nga gilaumang maghatag dugang kalamboan sa ilang dapit.

Si Konsehal Yan Lam Lim , chairman sa komite sa barangay affairs mipasabot nga ang maong lakang miagi sa makuting pagtuon sa mga hintungdang komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Lim ug komite sa pamalaod ug reglamento ni konsehal Ian Mark Nacaya.