Annual budget sa brgy Bulua giaprobahan sa konseho

HAYAN matagamtaman sa katawhan sa barangay Bulua ang dugang kaarangan ug kalamboan sa ilang barangay.

Kini human ang konseho sa sesyon niadtong Lunes nga gidumala ni bise mayor Kikang Uy misagop sa resolusyon nga nag-uli sa ordinansa sa barangay diin nasukip ang ilang 2021 Annual Budget nga adunay gibana banang kinitaan ug galastohon balor P34,475,927.

Lakip sa gihatagan og prioridad sa barangay nga mapatuman mao ang mga proyekto pagsemento sa kadalanan, pagkoral sa Zone 10 Day Care Center ug pagtul-id sa wooden bridge dihas Zone 8.

Ang barangay gipaabot usab nga mopalit og dump truck, motorsiko, PV Van, projector ug uban pang ekipo nga magamit sa ilang operasyon.

Si Konsehal Yan Lam, chairman sa komite sa barangay affairs, mibutyag nga iyang gisuportahan ang maong lakang human nakita nga kini makaayo sa katawhan sa barangay ug daghan ang mabulahan sa serbisyo nga itanyag.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Lim ug komite sa pamalaod ug reglamento ni konsehal Ian Mark Nacaya.