Annual Budget sa Brgy. Bugo giaprobahan sa Konseho

HINGPIT nang maimplementar sa Barangay Bugo ning syudad ang ilang mga programa ug proyekto nga gipunduhan ubos sa ilang supplemental budget sa milabayng tuig.

Kini human ang Konseho sa Syudad sa sesyon niadtong Lunes nga gidumala ni Bise Mayor Bebot Rodriguez misagop og resolusyon nga nag-uli sa ordinansa sa maong barangay nga may kalabutan sa ilang supplemental budget nga  mokabat sa P6,384,156.

Tipik sa gigahinan sa maong budget ang pagrehabilitar sa mga dalan ug drainage ingon man mga kanal, pagtul-id sa multi-purpose building ug pag-instalar ingon man pagmintinar sa ilang mga street lights.

Dugtong niini, migahin usab ang barangay og igong pundo alang sa pagrehabilitar sa ilang day care centers, pag-improbar sa health center ug uban pang proyekto nga maghatag dugang kalamboan sa ilang dapit.

Ang resolusyon nga gisagop sa konseho alang sa maong katuyuan gipaluyuhan sa Komite sa Barangay Affairs ni Konsehal Yan Lam Lim ug Komite sa Pamalaod ug Reglamento ubos ni Konsehal Edgar Cabanlas.