Annual Budget sa Besigan aprobado na sa Konseho

MAHIMO nang ipatuman sa Barangay Besigan ang ilang mga programa ug proyekto nga gihatagan og prioridad karong tuiga.

Kini, human ang Konseho sa syudad sa sesyon kagahapon nga gidumala ni Bise Mayor Bebot Rodriguez, misagop sa resolusyon nga nag-uli sa ordinansa sa Besigan diin nasukip ang ilang 2023 Annual Budget alang sa implementasyon.

Tipik sa ilang gipunduhan ang pagrehabilitar sa Multi-Purpose Hall, kadalanan sa barangay ug sistema sa panubig. Gigahinan usab sa barangay og igong pundo ang ilang programa sa quick response ug pagpamalit sa supplies ug ekipo nga magamit panahon sa kalamidad.

Ang budget sa barangay miagi sa makuting pagtuon ug deliberasyon sa mga hintungdang komite sa konseho ug mahimo ng ipatuman sa labing dali nga panahon aron usab mapahimuslan sa katawhan sa ilang dapit.

Ang resolusyon nga gisagop sa konseho alang sa maong katuyuan gipaluyuhan sa Komite sa Barangay Affairs ni Konsehal Yan Lam Lim ug Komite sa Pamalaod ni Konsehal Edgar Cabanlas.