Annual Budget sa 2 ka barangay giuyonan sa konseho

HINGPIT nang mapatuman sa Barangay 7 ug Iponan ang ilang mga programa ug proyekto karong tuiga.

Kini human ang konseho sa syudad sa sesyon niadtong Lunes nga gidumala ni Bise Mayor Kikang Uy misagop og managlahi nga resolusyon nga nag-uli sa ordinansa sa Brgy. 7 ug Iponan nga may kalabotan sa ilang 2021 Annual Budget.

Sa ilang 2021 budget nga P2,982,034, ang Brgy. 7 migahin og pundo alang sa sa ilang drainage system, pag-instalar og suga sa kadalanan ug pagrehabilitar sa mga fasilidad sa barangay.

Samtang ang Brgy. Iponan nga adunay gibanabanang kinitaan ug galastohon P25,473,378 migahin usab og pundo aron gamiton pagtukod og multi-purpose hall, pagrehabilitar sa ilang drainage system, day care centers og kadalanan ug ang pagtul-id sa tulo ka edipisyo sa senior citizens.

Gigahinan usab sa barangay ang pag-instalar og suga sa kadalanan, pagpatuman sa livelihood development program alang sa BWDC, mag-uuma, solo parent og PWD ingon man sa pagpamalit og mga ekipo o gamit nga naglakip sa backhoe, laptop, printers, desktop computer, airconditioner, sound system, CCTV ug generator.

Dugtong niini gipundohan sa duha ka barangay ang ilang personal services, Maintenance and other operating expenses, pagpatuman sa mga programa alang sa mga kabatan-onan, pagpamalit og mga materyales nga magamit panahon sa kalamidad ug uban pang mga programa nga makahatag og dugang kalamboan sa ilang barangay.

Si Konsehal Yan Lim mipasabot nga ang maong ordinansa miagi sa makuting pagsusi ug deliberasyon sa lain laing komite sa konseho ug nasuta nga mahimo nang ipatuman sa labing dali nga panahon.

Ang mga resolusyon nga gipalabang sa konseho alang sa maong katuyoan gipaluyohan sa komite sa Barangay Affairs ni Konsehal Lim ug komite sa pamalaod ug reglamento ubos ni Konsehal Ian Mark Q. Nacaya.