Animal Welfare Act gihingusgan ni Abaday

SUPORTADO ni Konsehal Roger Abaday, Chairman sa Komite sa Environment, ang pag-amendar sa Ordinance No. 9852-2005 kon Animal Control and Welfare Ordinance sa tinguha nga makamugna sa gikinahanglang Animal Rescue Shelter ang syudad.

Kini ang pamahayag sa konsehal sa miaging tigom sa Komite sa Climate Change Adaptation and Mitigation and Disaster Risk Reduction ni Konsehal Bernie Esparcia human gituki ang sugyot ordinansa nga giduso ni Bise Mayor Bebot Rodriguez nga maghatag og kapasegurohan sa mga hayop panahon sa katalagman.

Gisugyot ni Abaday nga aduna gyud untay impound area alang sa mga mananap ang matag barangay aron mahatagan sa higayon nga malukat sa dili pa matunol sa City Veterinary Office. Gisugyot usab sa konsehal nga marehistro ang tanang mga iro diha sa barangay aron wala nay mga laag nga iro ug para mas sayon na ang pag-ila ug pagpahimulos sa mga programa sama sa pagkapon, pagbakuna ug uban pang programa alang sa mga binuhing mananap.

“Hinaut unta nga kining mga bag-ong napili nga opisyal sa barangay magmakugi dinha sa pagpatuman sa mga balaod kalabot sa Animal Welfare Act aron matabangan ang publiko nga luwas sa pagpamaak sa iro ug makunhoran ang kaso sa rabies,” pamahayag ni Konsehal Roger Abaday.