Animal raising ordinance sa Brgy. 18 aprobado sa konseho

HAYAN mapalapdan pa ang programa sa Barangay 18 diha sa pagkontrolar ug paghatag kapasegurohan sa tanang matang sa mananap.

Kini human ang Konseho sa sesyon niadtong Lunes nga gidumala ni Presiding Officer Pro Tempore Konsehal Romeo Calizo  misagop og resolusyon nga nag-uli sa ordinansa sa barangay nga  gitawag og Animal Raising Ordinance of Barangay 18.

Ubos sa  maong ordinansa, ang tanang lomolopyo sa maong barangay gimandoan  nga iparehistro gayod  ang ilang mga binuhing hayop alang sa ID tag aron malakip kini  sa prioridad nga serbisyo sa kagamhanan  nga gipasiugdahan sa buhatan sa City Veterinary ug malikayan ang pagmulta sa nakalatid niining ordinansa.

Sumala sa barangay  nga pinaagi niini daling mailhan  ang mga tag-iya sa iro ug daling makontrolar ang pagsaka sa kaso sa rabbies sa maong barangay.

Alayon sa maong ordinansa,  ang    barangay motudlo  og usa ka barangay animal welfare coordinator nga magsilbi isip anti rabies coordinator aron masiguro ang husto nga serbisyo ug pamaagi sa pagpamuhi sa mga hayop.

Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ug reglamento ni Konsehal Edgar Cabanlas. (RNQuiblat/SP)