Agro-Forestry, farmer’s training center matukod dihas Balubal

Hugot nga gisuportahan sa konseho sa syudad ang mga programa pagproteher sa kinaiyahan sa syudad. Kini human ang konseho sa dakbayan sa sesyon niadtong Lunes nga gidumala ni Bise Mayor Jocelyn Rodriguez mipalabang sa ordinansa nga naghatag og katungod ni Mayor Klarex Uy pagpirma sa Memorandum of Agreement (MoA) tali sa Del Monte Foundation, Inc., Balubal Integrated Social Forestry Farmers Association (BISFFA) ug konseho sa Barangay Balubal nga naglangkob sa pagpatuman sa Agro-Forestry Nursery and Farmer’s Training Center Project.

Ubos sa MoA, ang Del Monte, isip kabahin sa ilang community program, mopahigayon og mga kalihukan nga mag-abag sa pagproteher sa kinaiyahan ug sa mga mag-uuma pinaagi sa pagpasiugda og livelihood programs, samtang ang kagamhanan mao ang motabang sa pagproteher, pagpreserba ug pagpalambo sa natural resources pinaagi sa pagpatuman sa Agro –Forestry/Reforestation programs ug pag-establisar og parke sa dapit.

Samtang ang BISFFA, usa ka organisasyon sa mga mag-uuma sa barangay, mao ang gitahasan sa pagpatuman sa Reforestation Program ug makiglambigit sa livelihood development pinaagi sa Agro-Forestry seedling production.

Niini, ang konseho sa Balubal gitahasang magsuporta sa mga lakang dinha sa pagproteher, pagpreserba ug pagpalambo sa kinaiyahan ingon man mosuporta sa mga inisyatibo nga mapalambo ang kapanginabuhian sa mga mag-uuma.

Ang ordinansa nga gipalabang sa konseho alang sa maong katuyuan gipaluyuhan sa komite sa environment ni Konsehal Roger Abaday ug komite sa pamalaod ni Konsehal Ian Mark Nacaya.