Aga, Yvy, dugang sakop sa komite sa Sports, Youth Development

Giuyonan sa konseho sa syudad sa sesyon niadtong Lunes nga gidumala ni Bise Mayor Bebot Rodriguez ang resolosyon nga nagtudlo nila ni Konsehal Aga Suan ug Yvy Emano isip dugang mga sakop sa komite sa sports and youth development.

Niini, ang duha ka konsehal mahimo nang makapartisipar sa tanang hisgutanan sa komite nga gidumala ni Konsehal John Michael Seno.

Sa maong lakang, giamendar sa konseho ang Resolosyon No. 14200-2022 nga naghan-ay sa komposisyon sa mga komite sa kasamtangang konseho sa dakbayan.

Mahinumduman nga ang konseho una nang misagop sa resolosyon nga naghatag og pagtugot sa chairman sa komite pagdugang sa ilang mga sakop ubos sa kompirmasyon sa tibook konseho.

Ang komite sa sports mao ang gitahasan pagtuon ug paghimo sa pakisusi sa mga butang ug lakang nga makaapekto sa pag-uswag ug pagbansay sa kabatan-onan alang sa responsable nga pagpangulo ug pagpasiugda sa nagkalain-laing programa sa paugnat sa kusog sa syudad ug uban pa.

Ang resolosyon nga gipalabang sa konseho alang sa maong katuyoan gipangamahanan ni Konsehal John Michael Seno.