Adlaw, Bulan sa Brgy Kauswagan saulogon

SAULOGON sa Barangay Kauswagan sa bulan sa Mayo matag tuig ang “Bulan sa Barangay” ug matag Mayo 1 ang “Adlaw sa Kauswagan”.

Kini human ang konseho sa syudad sa sesyon niadtong Lunes nga gidumala ni Presiding Officer Protempore Konsehal Edgar Cabanlas gisagop ang resolosyon nga nag-uli sa ordinansa sa Kauswagan nga nagdeklara sa maong kasaulogan ug naggahin sa igong pundo alang sa pagpahigayon sa mga cultural activities.

Sa ordinansa sa barangay gipasabot nga dugay nang gipangandoy sa ilang administrasyon nga mabantog ang barangay dili lang sa natad sa pagdumala kun dili lakip na sa mga kalihukan nga makapaagni sa mga langyaw pagbisita sa ilang dapit nga magbalon kanila’g kasinatian nga dili nila makalimtan.

Subay sa balaod, ang barangay gihatagan sa gahom pagpalabang sa mga lakang og balodnon nga maghatag og kaayohan sa kinabag-an nga magpalig-on sa relasyon sa residente ug mga opisyal sa ilang dapit.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam Lim ug komite sa pamalaod ni Konsehal Ian Mark Nacaya.