Ad hoc magtuki sa gitunol nga Covid 19cash assistance magtigom karong hapon

MAGTIGOM karong alas 2 sa hapon dinha sa hawanan sa konseho ang ad hoc committee nga gimugna sa komite sa social services ni Konsehal Girlie Balaba aron magtuki ug mag-imbestigar in aid of legislation sa gitunol nga Covid 19 cash assistance atol sa pagdeklara sa dakbayan nga ubos sa Enhanced Community Quarantine (ECQ).

Subay sa Resolosyon No. 01-2022 sa komite, gitudlo nga chairman sa ad hoc committee si Konsehal James Judith II uban ni Konsehal Roger Abaday isip vice chairman ug nila ni Konsehal Bernie Esparcia, Ian Achas, Girlie Balaba, Alam lim ug John Michael Seno isip mga sakop.

Tukion sa tigom ang gisugyot ni Judith nga resolosyon nga maghangyo sa CSWD paghatag og status report sa pag-apod apod sa covid 19 cash assistance o’ ayuda niadtong tuig 2022-2021.

Niini, gidapit nga motambong sa tigom sila si city administrator Atty. Roy Hilario Raagas, city legal officer Atty. Kenneth Tamala, kanhi konsehal Eric Salcedo, DSWD-10 regional director Ramel Jamen, acting CSWD officer Anecia Tongson, city DILG director Engr. Jane Docallos, city budget officer Atty. Percy Salazar, city accountant Atty. Beda Joy Elot, city treasurer Jasmin Maagad ug OCA head Oliver Egypto.