Achas naninghuha mamintinar kalimpyo sa Puerto Mkt

SI Konsehal Ian Rustico Achas, chairman sa Komite sa Fisheries and Aquatic Resources, naghangyo nga mamintinar matag adlaw ang kalimpyo sa merkado sa Puerto.

Kini ang unod sa special report sa konsehal sa sesyon sa Konseho niadtong Lunes, nga gidumala ni Bise Mayor Bebot Rodriguez.

Matod ni Achas nga ang mga molopyo sa barangay Cugman paingon sa barangay Bugo diha mamalit sa merkado sa Puerto, ug ulaw kaayo nga makita sa katawhan ang kahugaw sa maong merkado.

Iyang gisugyot nga kun mahimo,matag gabii magsugod ang paglimpyo. Mahimong himuon gikan sa alas 6 hangtod alas 8 sa gabii sa atong mga street sweepers ang paghinlo ingon man ang pagkolekta sa basura sa mga garbage trucks aron pagka buntag hinlo na ang merkado.

Namatikdan usab niAchas nga gamay lang ang mga street sweepers nga nadestino sa dapit ug iyang gihangyo nga madugangan ang mga personahe aron kanunayng limpyo ang merkado sa Puerto.

Ang hangyo ug panawagan ni Achas giduso ni Bise Mayor Bebot Rodriguez ngadto sa Komite sa Economic Enterprises ni Konsehal Yan Lam Lim alang sa tukmang aksyon ug rekomendasyon.