Achas nangusog hingpit maapod-apod mga boat engines sa mangingisda

NANGUSOG si  Konsehal Christian Rustico Achas, Chairman sa Komite sa Fisheries nga masolusyonan  ang mulo sa 24 ka asosasyon sa mangingisda sa dakbayan.

Sa sesyon sa Konseho niadtong Lunes nga gidumala ni Bise Mayor Bebot Rodriguez, gipahibalo sa konsehal nga adunay P2 milyones nga nadawat ang mga mangingisda  isip ilang ganti  sa  gipasiugdahang  Malinis  at Masaganang Karagatan (MMK) nga programa sa Bureau of Fisheries and Aquatic Resource (BFAR).

Matud ni Achas nga nalipay unta ang mga kapunungan mananagat sa ganti nga ilang nadawat kay aduna silay  magamit  pagpalit sa  kagamitan  sa  pagpangisda, apan subo pamalandungon  nga hangtod karun wala pa nila madawat ang ilang  gihangyong  mga ekipo taliwala  nga  natunol na sa BFAR ang maong budget ngadto sa syudad niadto pang Mayo 2023 atol sa kasaulogan sa fisherfolk’s month.

Nasayran nga nahatagan na og panugot ang kagamhanang lokal sa dakdayan  pinaagi ni Mayor Klarex Uy paggamit sa maong ganti  aron mapalit na ang 20 ka motor boat engines sa ingon maapod-apod  na kini  ngadto kanila.

Hinoon, usa sa nakita sa konsehal nga  hinungdan  sa nahitabong kalangan sa proseso  mao  ang  pakyas nga  pagtambong sa  hepe sa  mga hingtungdang  buhatan.

Dugtong niini, gihangyo  ni Konsehal Achas  ang mga hintundang  hepe  sa buhatan sa City Hall pagtambong  sa ipahigayong tigom  alang sa maong katuyuan  ug mipahimangno nga kon magpadala   og  representante  unta kadto  gayong  makatubag sa mga pangutana sa komite  aron  dali kining maaksyonan .

Ang maong taho giduso ni Bise Mayor Bebot Rodriguez sa Komite sa Fisheries ubos ni Konsehal Achas ug sa Komite sa Agriculture ni Konsehal Jay Pascual alang sa dugang pagtuon ug rekomendasyon.