Achas nahingawa sa pag-professionalize sa CDT

“SA pagsugod man gud sa una, voluntary ra gyud ang ilang pagtudlo. Ang uban wala nakagradwet pero dugay nang  nagtudlo isip mga daycare teacher sa barangay”.

Kini ang pamahayag ni Konsehal Ian Achas, Chairman sa Komite sa Fisheries,  atol sa sesyon sa Konseho niadtong Lunes nga gidumala ni Bise Mayor Bebot Rodriguez sa special report ni Konsehal Girlie Balaba kabahin sa pag-professionalize sa mga child development teacher (CDT) sa syudad.

Matod  sa konsehal  nga kaniadtong siya pa ang  Kapitan  sa Barangay Puerto, iyang nabantayan nga nanigulang na lang pagtudlo ang ilang mga daycare teachers apan  ang bugtong  gihuptan  lamang mao ang trainings gikan  sa buhatan sa City Social Welfare Development (CSWD).

Mipasabot ang konsehal nga sa iyang kasinatian, ang barangay man  ang magrekomendar sa daycare teacher ngadto sa mayor, ug ang barangay mohatag lang og gamay nga katugbang alang sa honorarium sa maong magtutudlo.

Niini, nanghinaot si Konsehal Achas nga dili unta mahikawan ang  mga magtutudlo ilabina kadtong dugay  na nga nagatudlo sa daycare center sa barangay  sa himoong  pag-professionalize sa mga child development teacher.