Achas misugyot mabutangan permanente nga police station ang Upper Puerto

Hugot nga gihangyo ni Konsehal Ian Achas nga mabalik ug mabutangan sa permanenteng Police Station ang Upper Puerto alang sa daling pag-responde sa kapolisan sa mga insidente ug emerhensiya.

Kini ang hangyo sa konsehal, atol sa sesyon sa Konseho niadtong Lunes nga gidumala ni Bise Mayor Bebot Rodriguez, human mibisita ang bag-ong City Police Director nga si P/Col. Salvador Radam.

Sumala ni Achas nga malangan ang pag-responde sa kapolisan panahon sa insidente tungod sa kalayo, kay anaa sa sentrong bahin sa barangay Puerto nahimutang ang kasamtangang police station.

Niini, si Radam namahayag nga ang pagdugang og Police Station nagkinahanglan sa pag-aprobar sa kaulohan. Hinoon, iyang gisugyot ang pagbutang sa Police Outpost ug police on duty alang sa labing daling aksyon ug mapatunhay ang kahusay ug kalinaw sa dapit.

Dako ang pasalamat ni Achas kang Radam sa paghatag og kapasigurohan sa hangyo sa mga molopyo sa Upper Puerto ning syudad.