Achas mihangyo maablihan pipila ka dalan sa Cogon, Carmen

NANGHINAOT si Konsehal Christian Rustico Achas nga maablian ang mga kadalanan sa mercado Cogon ug Carmen nga kasamtangang gisirad-an ug gigamit alang sa pang-ekonomiyang katuyoan.

Kini ang unod sa special report sa konsehal sa atol sa sesyon Konseho  niadtong Lunes nga gidumala ni Bise Mayor Bebot Rodriguez. 

Matud ni Achas nga dakong kahasol  sa mga gapanakayan diha sa ilang pagpauli  sa ilang  tagsa tagsa ka panimalay ang  kapiot sa trapiko ug ang pagsirado sa nasangpit nga mga dalan maoy iyang nakita  nga hinungdan  sa maong  problema.

Hinoon, walay pagsupak ang konsehal sa pagsirado sa kadalanan tungod sa pagpahimutang sa  mga negosyo  kung kini nahiuyon  lang unta sa lagda sa Akta Republika 7160 kon Local Government Code.

“I am not against the welfare of the people. However, we must ensure that in the pursuit of life improvement, we should not sacrifice other’s welfare and violate our laws,” panapos ni Achas.

Nunot niini, si Bise Mayor Bebot Rodriguez miduso sa maong taho ngadto sa Komite sa Public Utilities ni Konsehal Romeo Calizo ug sa Komite sa Pamalaod ug Reglamento ni Konsehal Edgar S. Cabanlas alang sa dugang pagtuon.