Achas malaumon masolosyonan problema sa panubig sa Upper Puerto

Malaumon si Konsehal Rustico Ian Achas, chairman sa komite sa Fisheries and Aquatic Resources, nga malakip sa umaabot nga plano sa Cagayan de Oro Water District (COWD) ang pagbutang og dugang mga bulk water supply aron masolosyonan ang kakulangon sa supply sa tubig sa syudad ilabina ang Barangay Puerto diin padayong problema ang kakulangon sa supply sa tubig.

Kini ang hangyo og panawagan ni Achas sa kadagkuan sa Water District human kini gidapit sa sesyon niadtong Lunes nga gidumala ni Presiding Officer Protempore Konsehal Romeo Calizo. Sumala ni Achas nga dakong problema, kahasol ug gasto sa mga molopyo sa Upper Puerto ang kakulangon sa supply sa tubig tungod kay kinahanglan pa sila nga mopalit og tubig sa Barangay Agusan ug ikarga sa ilang tagsa-tagsa ka mga kareton.

Niini, gisugyot ni Achas sa mga opisyal sa COWD nga punduhan ug tun-an nga maka-operate na ang water reservoir nga nahimutang sa Purok-6 Upper Puerto aron maoy makatabang pag-supply sa panubig sa mga molopyo sa dapit.

Sa iyang bahin, si Engr. Antonio Young, General Manager sa COWD, mibutyag nga nalakip na sa plano ang maong dapit ug gihulatan lang ang pundo aron masugdan ang proyekto. Gani, gitinguha usab sa Water District nga maka-negotiate ang lokal nga kagamhanan sa Manolo Fortich nga makatabang pag-supply sa tubig.

Dako ang paglaum ni Achas nga kun mapatuman ang plano sa Water District nga madugangan ang ilang bulk water supplier hayan mapagaan ang problema sa supply sa tubig sa dakbayan.