Achas gustong makisayod sa P270 milyon nga budget sa pagkolekta sa basura sa syudad

SI Konsehal Christian Achas, chairman sa komite fisheries and aquatic resources, gustong makisayod ug mahatagan sa katin-awan sa buhatan sa City Local Environment and Natural Resources Office kon gi-unsa paggamit ang gigahin nga P270 milyon sa kagamhanang lokal alang sa pagkolekta sa basura sa dakbayan.

Kini ang unod sa special report ni Konsehal Achas atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Achas nga nalatid ang maong pundo sa tuig 2024 nga gihatagan ni City Mayor Rolando Klarex Uy ang matag barangay sa P103 mil alang sa pag-atiman sa basura ug ang pagkolekta sa solid waste.

Gani mihatag pa kini sa dos pesos nga incentibo sa kabarangayan matag kilo sa residual waste nga mahatod sa barangay ngadto sa landfill area, sumpay sa konsehal.

Siya midugang nga sa Annual Investment Plan sa maong tuig, gisugyot sa CLENRO nga mahatagan

ang 77 ka barangay sa syudad sa P103 mil  nga pundo alang sa nasangpit nga programa apan wala kini nalatid sa annual investment plan diin butang nga boot niining pakisayran ug gi-unsa paggamit sa maong pundo.

Nunot niini giduso ni Vice Mayor Bebot Rodriguez ang maong special report ni Konsehal Achas ngadto sa komite sa environment ni Konsehal Roger Abaday aron mahatagan sa dugang pagtagad ug katin-awan ang maong isyu.