Achas gikahingawa ang kahimtang samga mamaligyaay sa Puerto Market

GIPAKISAYRAN ni Konsehal Rustico Achas, chairman sa komite sa fisheries and aquatic resources, ang kahimtang sa mga mamaligyaay sa Puerto Public Market diin anaa kasamtangan gibutang sa gawas nga bahin sa maong merkado samtang kamulo ang pagtibawas sa maong proyekto.

Kini ang gipaambit nga reaksyon ni Konsehal Achas atol sa sesyon niadtong Lunes nga gidumala ni Presiding Officer Pro Tempore Konsehal Romeo Calizo agig pangayog katin-awan kon malibre ba sila sa ilang balayronon tungod sa ilang kasamtangang sitwasyon.

Hisayran nga giduso sa konseho sa syudad ang paghatag og lugway sa  balayronon sa buhis sa tanang mamaligyaay sa kamerkadohan sa tuyo nga dili kini madak-an sa ilang mga bayronon.

Malaumon si Konsehal Achas nga masabtan sa mga mamaligyaay sa Puerto Public Market nga dili kini mahimong malibre subay sa gisunod nga ordinansa ug gihangyo niini ang pagsabot og gamay’ng pasensya tungod kay ang pagtibawas sa merkado sa Puerto alang man sa ilang kaayohan. (MLRapanot/SP)