Abuno nga makuha gikan sa basura makatabang sa agrikultura-Nacaya

DAKO og ikatabang sa agrikultura ang mga abuno nga ma-produce gikan sa Material Recovery Facility (MRF) sa kabarangayan samtang padayon nga gipatuman ang “No Sergregation No Collection Policy” sa mga basura.

Kini ang unod sa reaksyon ni Konsehal Ian Mark Nacaya sa special report ni Konsehal Bernie Esparcia atol sa sesyon sa konseho niadtong Lunes nga gidumala ni Presiding Pro Tempore Konsehal Romeo Calizo mahitungod sa problema kon asa ipahimotang  ang natigom nga mga plastic, botelya ingon man fertilizer kon mapunona ang MRF.

Sumala ni Nacaya nga adunay kompanya nga nagsuporta sa barangay isip ilang corporate social responsibility sama na lang sa Shell Philipines nga mi-produce og mga eco-block  gikan sa recovered materials sa mga basura sa Barangay Macabalan.

Gibutyag usab sa konsehal nga didto sa Iligan City mismo ang kagamhanan ang nangunay pagpalit sa basura o waste gikan sa merkado para himoong abuno ug iapod-apod ngadto sa mga mag-uuma.

Niini, gipadayag ni Konsehal Nacaya ang iyang suporta ug desidido siya nga mopartisipar sa panaghisgot niini saKomite sa Agrikulutura ni Konsehal Jay Pascual aron masuportahan ang sector sa agrikultura.