Abbu nagsiguro sa kahimtang sa dinakpang mga hayop

BUOT lang masiguro ni Konsehal Joey Abbu, Jr., chairman sa komite sa labor and employment, kung anaa paba ang city pound facility ug unsay mahitabo sa mga hayop nga dinakpan kon kini dili malukat sa tag-iya.

Atol sa sesyon sa konseho niadtong Lunes nga gidumala ni Bise Mayor Bebot Rodriguez diin ilang gikompirmahan ang katudloan ni Dr. Helen Ann Tacondong isip City Veterinarian, si Konsehal Abbu nangutana usab kon giunsa pag-ila sa maong buhatan sa tag-iya sa mga hayop ug unsaon pagkahibalo sa tag-iya nga makuha ang ilang mga mananap labina nga gitagaan lamang og 72 ka oras o tulo (3) ka adlaw ang mga pet owners sa pagkuha sa ilang mga hayop.

Sa iyang tubag, si Dr Tacondong mibutyag nga 12% porsyento lang ang nag-claim sa ilang mga hayop. Samtang adunay duha ang kapilian kon dili malukat ang dinakpang mananap nga mao mercy killing o humane euthanasia subay sa National Law ubos sa Anti-Rabies Act ug sa balaod sa dakbayan.

Gipasabot ni Tacandong nga dili ma-akomodar sa city pound facility diha sa Barangay Balubal sa kadaghan sa nadakpang mananap ug kung walay mosagop sa maong mga hayop, moresulta gyud sa mercy killing pero gisuro sa buhatan nga gisunod gayud ang tawhanong paagi sa pagpatay sa mga hayop. Gani ang siyudad migasto og P300 kada hayop alang sa euthanasia.

Ang ilang buhatan nagmugna og Barangay Pamatong Team aron direkta matubag ang problema sa naglatagaw nga mga iro ug adunay regular nga eskedyol kada Lunes ug Martes depende sa naghangyo nga mga barangay. (RNQuiblat/SP)