Abbu misugyot sa pagpatuman sa speed limit

“SAMA sa akong kanunay nga giingon… ang trapiko usa ka timailhan nga ang lungsod usa ka malamboon nga lugar”.

Kini ang gibutyag ni Konsehal Joey Abbu, Jr., chairman sa komite sa labor and employment atol sa programang “Panagtagbo 2025”.

Matod sa konsehal nga dili gayud mawagtang ang problema sa trapiko ilabina kay ang dakbayan sa Cagayan de Oro progresibo na kaayo ug anaa na sa pagpangandam nga mamahimong metropolitan city.

Gani ang siyudad aduna nay traffic code diin naa diha nakalatid ang mga balaod nga kinahanglan sundon.

Dugtong  ni Abbu nga ang problema sa traffic dili lang anaa sa pagdumala sa lokal nga kagamhanan, sa traffic enforcer nga sangkap sa kasinatian, mga traffic lights,  kon dili lakip na usab ang disiplina sa mga motorista sa pagtuman sa mga balaod sa trapiko butang nga maminusan ang mga aksidente sa sakyanan.

Niini, si Konsehal Abbu hugot nga misugyot nga mag-implementar ang siyudad og speed limit bisan magsugod lang sa poblacion area ug magpalit og mga speed gun aron maoy magamit pagtino sa maximum speed limit sulod sa syudad. (RNQuiblat/SP/Photo grabbed from LIHOK Katawhan FB page)