Abbu mirekomendar pagtul-id sa sistema sa panubig

“ANG kontrata ba gayud ang maong rason ngano naay problema sa suplay sa tubig o ang sistema sa panubig dinhi sa dakbayan sa Cagayan de Oro?”

Kini ang unod sa special report ni Konsehal Joey Abbu, Jr., Chairman sa Komite sa Labor and Employment, atol sa sesyon sa konseho niadtong Martes nga gidumala ni Bise Mayor Bebot Rodriguez.

Gipasabot sa konsehal nga  sa miaging bulan aduna mga kabalaka sa panagbingkil sa kontrata  human  ang Cagayan de Oro Bulkwater Inc. (COBI) miluwat og  notice of disconnection  ngadto sa Cagayan de Oro Water District (COWD) nga maoy  gasupply og tubig sa dakbayan.

Matod  ni Abbu  nga  mipahigayon  na og  pagdungog ang Konseho sa Dakbayan bahin niini  samtang  si Mayor  Klarex  Uy nimugna usab  og task force nga gitahasan  sa pag-imbestigar sa ilang kontrata.

Gani, tungod sa maong problema nakasinati sa kahinay ngadto sa walay agas  sa tubig ang pipila nga barangay sa dakbayan nga diin  maoy gihimong rason  sa COWD nga adunay  problema sa linya sa mga tubo.

Dugang pa, mibutyag ang konsehal nga sukad sa  pagkamugna sa COWD wala  pa kini  makailis og  mga pipelines hinungdan   nga  daghang mga leaking  sa linya gumikan usab  sa pressure sa tubig  gawas nagkadaghan na usab ang konsumante kon itandi sa nanglabayng katuigan.

Niini, gisugyot ni Konsehal Abbu nga naa gyud untay maayong sistema sa panubig nga mahatag sa COWD ngadto sa ilang mga konsumante kay, bisan pa man masulbad ang panagbingkil sa kontrata, kung dili mahan-ay ang ilang sistema sa tubig magpabilin gihapon kini nga problema sa umaabot nga katuigan.

Ang maong taho ni Abbu giduso ni Bise Mayor Bebot Rodriguez ngadto sa Komite sa Public Utilities ni Konsehal Romeo Calizo alang sa tukmang rekomendasyon.