Abaday uyon ma-regulate pagbaligya og pellet gun

Hugot nga gisuportahan ni Konsehal Roger Abaday, chairman sa komite sa games and amusement, ang lakang pag-regulate sa pagbaligya og pellet gun dinhi sa dakbayan sa Cagayan de Oro tungod kay peligro sa disgrasya ilabina sa kabataan.

Kini human si Konsehal Romeo Calizo, sa sesyon niadtong Lunes nga gidumala ni Bise Mayor Bebot Rodriguez, mitaho kabahin sa peligrong dala sa pagdula sa pellet gun.

Sumala ni Abaday nga dako ang posibilidad nga mabuta ang usa ka bata kun maigo sa bala sa pellet gun ug posible pa nga mosangpot sa panag-away sa mga ginikanan. Gani, mahimo pa nga magamit sa mga dautang elemento sa pagpanulis kay susama sa tinuod nga pistula ang hitsura niini, sumpay sa konsehal.

Siya nagtoo nga ma-regulate gayud ang pagbaligya sa pellet guns kun ipatuman sa hingpit sa kapolisan ug mga hingtungdan ahensya sa gobyerno ang mga balaod pinaagi sa makanunayong pag-monitor sa mga mamaligyaay niini.