Abaday subo sa hinay nga supply sa tubig sa COWD

DISMAYADO si Konsehal Roger Abaday, chairman sa komite sa Senior Citizen, subling problema sa supply sa tubig sa Cagayan de Oro Water District (COWD) sa pipila ka barangay sa syudad.

Kini ang unod sa special report ni Abaday atol sa sesyon niadtong Lunes nga gidumala ni Bise Mayor Kikang Uy. Sumala ni Kagawad Abaday nga niining panahon sa pandemya gikinahanglan kaayo sa katawhan ang insaktong supply sa tubig apan ang kahinay na hinoon sa agas ang nasinati sa katawhan ug adunay higayon nga anaay sagol nga hugaw ang agas niini.

Nagtoo si Abaday nga maayo na ang supply sa tubig sa syudad human gibahibalo sa COWD nga niadtong Marso 19 hangtod Marso 21 ning tuig nagpahigayon sila pagtrabaho sa ilang 2 unit 100 diameter isolation valve apan pabilin man gihapon nga hinay ang supply sa tubig, sumpay sa konsehal.

Niini nanawagan si Konsehal Abaday sa mga miebro sa Board of Directors sa Cagayan de Oro Water District ingon man sa mga opisyal sa maong buhatan nga mohimo ug konkreto nga aksyon kalabot sa nasangpit nga problema.

Subay niini nga panawagan ang maong report ni Abaday giduso kini ni Bise Mayor Kikang Uy sa komite sa Public Utilities ni Konsehal Teodulfo Lao Jr. alang sa tukmang aksyon ug rekomendasyon.