Abaday pabor pahamtangan ug disciplinary action mga enforcer nga pasaway

SI Konsehal Roger Abaday, chairman sa komite sa Senior Citizens, mibutyag nga maayo unta ang pagdumala sa dagan sa trapiko sa syudad tungod sa striktong pagpatuman sa balaod sa mga kawani sa Roads and Traffic Administration (RTA) apan dili maayo nga masubrahan tungod kinahanglan usab nga adunay tawhanon nga konsiderasyon.

Kini ang reaksyon ni Abaday sa gipadangat nga special report ni Konsehal Ian Mark Nacaya atol sa sesyon niadtong Lunes nga gidumala ni Bise Mayor Kikang Uy kabahin sa reklamo sa usa ka vendor batok sa pipila ka sakop sa RTA nga giingong gipang konpiska ang iyang baligya apan wala kini isyuhi sa resibo.

Sumala ni Abaday nga aduna gihapon siyay nadawat nga mulo sa usa ka negosyante diin mihangyo kini sa gamay nga konsiderasyon ngadto sa personahe sa RTA apan wala kini mikonsidera sa iyang hangyo.

Nagtoo si Abaday nga adunay pipila ka mga kawani sa Roads and Traffic Administration nga dili maayo og mga taras, hinoon daghan pa gihapon mga tarong nga sakop sa maong buhatan.

Nunot niini pabor si Konsehal Roger Abaday nga pahamtangan sa tukmang silot kadtong mga kawani sa RTA nga mapamatud-ang nag-abusar sa ilang katungdanan.