Abaday pabor abrihan ang traditional sabong

GIHULATAN karon ni Konsehal Roger Abaday, chairman sa komite sa Games and Amusement, ang desisyon ni Mayor Oscar Moreno kun abprobahan ang subling operasyon sa traditional sabong dinhi sa syudad human gipailawom kini sa IATF sa Alert Level 1.

Kini ang gipasabot ni Abaday sa mga cockpit owners human ang komitiba ug ang Konseho sa Syudad ubos ni Bise Mayor Kikang Uy mirekomendar ngadto sa buhatan sa mayor sa hangyo sa mga nanag-iya ug nagdumala sa mga sabongan.

Hinuon, iyang gitin-aw nga ubos sa gabayan sa Inter Agency Task Force (IATF) ang mayor ra gyud ang maka-desisyon o gitahasan nga makabuot sa maong matang sa operasyon.

Dugang pa ni Abaday nga igo lamang sila sa pagrekomendar ug nahimo na niini ang tahas sa komitiba.

Mahinumduman nga subling mihanyo ang mga cockpit owner nga maka balik na ang ilang operasyon sa traditional sabong human sa duha ka tuig nga pagsira tungod sa Covid-19.