Abaday naninguha maproteksyonan ang kinaiyahan

Padayon nga naninguha si Konsehal Roger Abaday, chairman sa Komite sa Environment and Natural Resources, nga mapanalipdan ug maprotektahan ang kinaiyahan.

Sa milabayng tigom sa komite, giduso sa konsehal balik sa City Local Enviroment and Natural Resources (CLENRO) ang sugyot ordinansa nga magdili sa mga opisyal sa barangay nga makiglambigit o’ manghilabot sa operasyon sa illegal mining o’ logging dinha sa ilang tagsa tagsa ka teritoryo ug nagpahamtang sa multa alang sa masapong makalapas niini.

Sa tigom, gipasabot ni Abaday ang tumong sa sugyot ordinansa nga makuha ang suporta sa mga opisyal sa barangay dinha sa pagpakgang sa mga kalihokan nga magdala og kadaut sa kinaiyahan.

Siya midugang nga kun ang mga opisyal sa barangay nagpangga ug naghigugma sa kinaiyahan nga adunay epekto sa panglawas, makatabang kini dili lang sa kaluwasan sa katawhan kun dili sa pagproteher sa kinaiyahan.

Sa iyang bahin, si Konsehal Aga Suan mipasabot nga ang maong sugyot ordinansa nagkinahanglan ug dugang pang mga probisyon ug angayang mahan-ay dala sa pag-abag sa DENR.