Abaday nangusog masulbad problema sa supply sa tubig sa syudad

Dismayado si Konsehal Roger Abaday sa pabalik balik nga problema sa supply sa tubig sa syudad tungod sa kahasol ug perhuwisyo sa katawhan.

Kini ang unod sa special report ni Abaday atol sa sesyon niadtong lunes nga gidumala ni bise Mayor Jocelyn Bebot Rodriguez.

Sumala ni Abaday nga nadawat niya ang mulo sa usa ka Kagay-anon nga naghangyong matabangan sa konseho sa problema sa kakulangon sa supply sa tubig dinha sa Cambridge Subd., Villamar Subd., Regency Subd. ug Sitio Pala-os, barangay Iponan.

Gani, lakip ang mga molopyo sa barangay Patag ug halos nga mga subdivision dinhi sa syudad susama ang reklamo sa sistema sa panubig ug usa lang ang tubag sa kadagkuan sa Cagayan de Oro Water District (COWD) nga naghimo sila og quarter repair, sumpay sa konsehal.

Dako ang pagtoo ni Abaday nga wala nagkulang og mga experto ang COWD aron masolosyonan ang maong problema apan sa gihimong imbestigasyon nasuta nga ang duha ka mga booster plant nga nahimutang sa barangay Camaman-an ug Balulang nga maoy nag-supply sa tubig, palungon sa kagabhion sa rason nga nagdaginot ang water district.

Nunot niini, gisugyot ni Abaday ang pagdapit sa kadagkoan sa Water District aron paghatag sa katin-awan sa maong isyu.

Ang taho ni Abaday giduso ni Bise Mayor Bebot Rodriguez ngadto sa komite sa public utilities ni Konsehal Romeo Calizo alang sa tukmang aksyon ug rekomendasyon.