Abaday nangusog makasalmot ang CDO team sa Batang Pinoy
GIHINGUSGAN ni Konsehal Roger Abaday, chairman sa Komite sa Games and Amusement, nga makapadala ang syudad og mga atleta sa ipahigayong Batang Pinoy sa umaabot November 21- 29, 2024 didto sa Puerto Princesa City, Palawan.
Sa iyang special report atol sa sesyon niadtong Lunes nga gidumala ni Presiding Officer Pro Tempore Konsehal Romeo Calizo, si Konsehal Abaday namahayag nga nagkinahanglan og suporta ug tabang sa kagamhanang lokal ang mga athleta ug coaches sa CDO Team gumikan kay limitado lang ang ilang pundo alang sa maong katuyoan.
Gani sa dulang basketball, tulo lang ka magdudula ang mapadala samtang upat alang sa karatedo, sumpay sa Konsehal.
Hinoon dako ang pagsalig ni Abaday nga andam kanunay motabang si Mayor Rolando ‘Klarex’ Uy sa mga athleta sa ilang panginahanglanon, ilabina kay ubay-ubay na nga medalya ang nahakot sa mga athleta sa CDO Team sa milabayng competition.
Nunot niini malaumon si Abaday nga matabangan ang mga delegado sa syudad sa ilang pag-apil sa Batang Pinoy Games.
Comments