Abaday nanawagan sa kanunayong pagpatuman sa lagda sa trapiko

SI Konsehal Roger Abaday, chairman sa komite sa senior citizens, naghangyo sa kadagkoan ug mga kawani sa Roads and Traffic Administration (RTA) nga ipatuman sa hingpit ang mga lagda sa trapiko sa syudad aron hapsay ang dagan sa trapiko.

Sumala ni Abaday nga nagpabilin pa gihapon ang problema sa dagan sa trapiko sa syudad tungod kay iyang na-obserbahan nga dili makanunayon ang pagpatuman sa balaod sa trapiko sa mga traffic enforcers.

Unta striktong mapatuman sa mga kawani sa RTA ang mga balaod sa trapiko ug dili sa pipila lang ka panahon, panawagan ni Abaday.

Matod niya nga iyang nasinati ug gani nakalantugi ang gwardiya sa usa ka establisamento nga nagbutang og reserve parking nga dili angayan hinungdan nga gisugyot niini nga mahatagan kini sa igong pagtagad.

Siya midugang nga kinahanglan ang kooperasyon sa RTA kay dako kini og makatabang sa pagpahapsay sa dagan sa trapiko, sa mga opisyal sa kabarangayan ingon man sa disiplina sa kaugalingon pinaagi sa pagtamod sa balaod sa trapiko.

Niini, nagtoo si Abaday nga pinaagi sa pagtinabangay ug kooperasyon, disiplina ug makanunayong pagpatuman sa lagda sa trapiko hayan makunhuran ang problema sa trapiko sa dakbayan.