Abaday nahingawa asa gilabay hazardous wastes sa CDO

Si Konsehal Roger Abaday, chairman sa komite sa environment, mipadayag sa iyang kabalaka kalabot sa tukmang paglabay sa mga hazardous wastes sama sa mga toxic substances gikan sa mga hospital, medical ug dental clinics ug susamang mga establisamento.

Kini human iyang nadawat ang reklamo o’ sugyot sa mga nanag-iya og medical clinics dinhi sa dakbayan ilabina ang presidente sa Philippine Dental Association of the Philippines. Giingon nga dakong problema kanila ang paglabay sa ilang medical waste materials, dili lang sa pribado kun dili lakip na sa mga hospital sa gobyerno.

Sa sesyon sa konseho niadtong Lunes nga gidumala ni Presiding Officer Protempore Konsehal Edgar Cabanlas, si Abaday mikwestyon kun asa gilabay ang maong mga hazardous wastes ug ang iyang nakuhang tubag mao nga si Davao City o’ Cebu City ginalabay sa mga hospital ang ilang medical ug hazardous wastes.

Niini, dako ang iyang pagduda nga gisagol ang maong matang sa basura sa mga gilabay d inha sa sanitary landfill sa Pagalungan tungod kay adunay mga taho nga dunay hospital trucks nga didto galabay sa ilang mga basura ug tataw kini nga supak sa ordinansa sa syudad.

Buot sa konsehal nga matabangan ug mahatagan sa igong pagtagad ang mulo sa mga medical ug dental clinics nga nag-operate sa syudad kay dako kini sila og natabang sa panudlanan sa dakbayan.

Niini, gisugyot ni Abaday nga dapiton sa komite sa panglawas ni Konsehal Malou Gaane ug sa iyang komite sa environment ang tanang tigdumala og mga hospital ug clinics aron mahisgutan ang reklamo ug mapangitaan sa tukmang solosyon.