Abaday nagtuong tumanon sa Rio Verde ang ilang gisaad nga presyo

DAKO ang pagtuo ni Konsehal Roger Abaday, Chairman sa Komite sa Games and Amusement, nga tumanon sa Rio Verde ang gisaad ug gihanyag nga prseyo sa mga konsumador sa tubig sa syudad panahon nga putlon sa Cagayan de Oro Bulk Water Inc (COBI) ang supply sa tubig  sa Cagayan de Oro Water District (COWD).

Kini ang gipadayag  sa konsehal atol  sa sesyon  sa Konseho niadtong Lunes nga gidumala ni Bise Mayor Bebot Rodriguez tungod sa kabalaka sa uban nga masubli ang isyu sa pagpahotak pagpataas sa presyo sa tubig sa dakbayan.

Sumala sa konsehal nga sa  gipahigayong panagtigom sa gimugnang task force sa syudad ug  bisan  gani sa ilang panaghisgut ni City Mayor Klarex Uy,  gipasalig sa  kadagkoan sa Rio Verde nga andam silang motabang pagsupply sa syudad sa nasabotan nga presyo.

Gidugang usab  sa konsehal nga kinahanglan lamang kita mosalig sa maong kasabotan tungod kay dili masiguro  nga magpadayon ang pagsupply sa COBI sa tubig ngadto sa COWD hangtod sa April 30 ning tuig.

Niini, malaumon si Abaday nga makab-ot ang tukmang solusyon sa problema sa panubig sa syudad.