Abaday nagtoo kakulangon sa tukmang impormasyon hinungdan sa kahugaw

DAKO ang pagtoo ni Konsehal Roger Abaday, chairman sa Komite sa Environment, nga ang dili ang pagtuman sa skedyul sa pagkolekta sa basura ang hinungdan sa kahugaw kun dili ang kakulangon sa pagpahibalo, disiplina, ug pakigtambayayong sa kabarangayan ang pipila sa hinungdan nga dili makolekta sa insakto ang mga basura.

Mao kini ang pamahayag sa konsehal sa gipadangat nga special report ni Konsehal Bernie Esparcia, sa sesyon sa konseho niadtong Lunes nga gidumala ni Bise Mayor Rodriguez, kabahin sa isyu sa pagkolekta sa basura sa syudad.

Matod ni Abaday nga kasagaran sa mga Local Government Unit sa nasud wala makatuman sa balaod nga naglatid sa giya ug patakaran sa tukmang pagdumala sa basura diin ang matag barangay gitahasan sa pagbutang og Material Recovery Facilities (MRF).

Dugang sa konsehal nga angayang mo-alalay ang kabarangayan sa pag-edukar sa katawhan aron masunod ang skedyul sa pagpagawas sa mga basura kay wala magkulang ang kontraktor sa ilang garbage trucks nga mokolekta sa basura.

Niini, ang taho ni Esparcia giduso ni Bise Mayor Bebot Rodriguez ngadto sa Komite sa Environment ni Abaday ug Komite sa Panglawas ni Konsehal Malou Gaane alang pagtuon ug rekomendasyon.