Abaday naghanyo nga butangan ug signages ang mga proyekto sa DPWH

NANAWAGAN si Konsehal Roger Abaday, chairman sa komite sa senior citizen, nga kinahanlan butangan nila ug signages o reflectorized warnings ang ilang proyekto aron malikay sa disgrasya ang katawhan nga lumalabay.

Kini ang unod sa gipadangat nga special report ni Abaday atol sa sesyon niadtong lunes nga gidumala ni Bise Mayor Kikang Uy.

Sumala ni Abaday nagreklamo ug nabalaka ang mga residente sa Villa Candida subdivision sa barangay bulua sa gihimong island construction sa Department of Public Works and Highways (DPWH) diha nasangpit nga barangay kay wala kini signages sama sa pagbutang ug reflectorized warnings ug peligro kini sa mga motorista ug sa mga lumalabay gani wala kini access road.

Nagtoo si Abaday nga wala kaayo kini ma-atiman sa nag-trabaho nga contructor kay bisan pagtuman sa sayon nga gabayan dili kini nila mapatuman.

Nunot niini gihingusgan ni Abaday nga mopasar ug resolusyon nga maghanyo sa mga kadagkuan sa DPWH nga usbon ang ilang construction plan nga maghatag niini sa insaktong dalan sa katawhan.

Niini gisugyot ni Bise Mayor Uy nga sulatan ang mga opisyal sa DPWH aron mapadangat kanila ang maong mulo ug aron mahatagan ug mapangita-an kini nila sa tukmang solusyon.