Abaday naghangyo pagrepaso tent rental sa Higalaay Night Café sa Rio Boulevard

SI Councilor Roger Abaday, Chairman sa Komite sa Environment, mipaabot sa iyang hangyo pagrepaso sa taas nga renta para sa mga buot muabang og pwesto sa ipahigayong night café diha sa Rio de Oro Boulevard subay sa kasaulogan sa CDO City Fiesta 2024 sa umaabot bulan sa Agosto.

Sa iyang special report sa sesyon sa konseho niadtong Lunes nga gidumala ni Presiding Officer Pro Tempore Councilor Romeo Calizo, wala malimot pagpasalamat si Abaday sa pribadong organisasyon nga buot mohatag og suporta aron mas-organisado ug mas bibo pa ang kapistahan sa dakbayan.

Apan, gipasabot sa konsehal nga kinahanglan dili malimitahan ang uban sa pagsalmot sa maong kalihokan tungod lamang sa kamahal sa maong renta.

Matod ni Konsehal Abaday, ang P50 mil nga balayrunon kada pwesto sama ra sa presyo sa mga renta sa pwesto sulod sa mall, butang nga gireklamohan sa mga ordinaryong negosyante nga buot modisplay sa ilang mga produktong utanon ug abot sa pag-uma.

"Dili kini angay i-tolerate nga klase sa pag-business kay ang boulevard is beyond the commerce of men. Para na sa kabibo ug dili maayo sudlan sa negosyo nga cut-throat nga dili maka-afford atong ordinaryong negosyante," sumpay ni Abaday.

Subay niini, ang maong taho giduso ngadto sa Komite sa Ways and Means, Social Services, Tourism ug Games and Amusement alang sa dugang pagtuon og aksyon.