Abaday nabalaka sa padayong problema sa pagbaha

GABAHAON gihapon ang pipila ka mga barangay diha sa distrito uno ning syudad. 

Kini ang unod sa special report ni Konsehal Roger Abaday, atol sa sesyon niadtong Lunes nga gidumala ni Bise Mayor Bebot Rodriguez. 

Nasayran nga naduso na ni Konsehal Abday ang maong mulo ngadto kang City Engineer Joel V. Momongan kinsa mi-refer usab nini ngadto sa buhatan sa Department of Public Works and Highways (DPWH) – District 1 Engineering Office. 

Gibutyag sa DPWH nga nakompleto ug nahuman na ang drainage system sa distrito uno, apan ang sobra ka-silted o nagsagol nga mga basura ang nakapabukog sa mga kanal dihas Barangay Bulua ug Patag hinungdan nga magbaha usab sa ubos nga bahin sa Carmen, Kauswagan, Bayabas, ug Bonbon. 

Sa iyang bahin, si Bise Mayor Bebot miaghat kang Konsehal Yan Lam Lim, presidente sa Liga ng mga Barangay, sa paghangyo sa mga barangay nga makig-coordinate sa City Engineer’s Office arun kanunay nga ma-declog ang mga nakabara sa kanal ug hinay-hinay kini nga malimpyo. 

Subay niini, gisugyot ni Abaday nga tun-an sa Komite sa Public Works ni Konsehal Edgar Cabanlas ang maong problema kauban ang mga opisyales sa barangay ug ang DWPH.